Շրջակա միջավայրի նախարարի տեղակալ Արամ Մեյմարյանը հանդիպել է Ռաուլ Վալլենբերգի անվան մարդու իրավունքների և մարդասիրական իրավունքի ինստիտուտի (ՌՎԻ) հայաստանյան գրասենյակի ղեկավար Լաուրա Միլնի հետ։
Հանդիպմանը մասնակցել են նախարարության համապատասխան ստորաբաժանման ներկայացուցիչներ և Օրհուսի կոնվենցիայի ազգային համակարգողը։
ՌՎԻ հայաստանյան գրասենյակը գործում է Երևանում 2023 թվականից՝ համագործակցելով Արդարադատության նախարարության, Մարդու իրավունքների պաշտպանի աշխատակազմի, Արդարադատության ակադեմիայի և մի շարք գիտակրթական հաստատությունների հետ։ Ինստիտուտը մեծ փորձ ունի մարդու իրավունքների և շրջակա միջավայրի կառավարման համադրման ոլորտում՝ առաջարկելով միջազգային և ԵՄ չափանիշներին համապատասխան մոդելներ։
Հանդիպման ընթացքում քննարկվել են համագործակցության հնարավոր ուղղություններն, այդ թվում՝ իրավունքահեն բնապահպանական կառավարում, արդարադատության մատչելիություն շրջակա միջավայրի հետ կապված հարցերում, կենսաբազմազանության պահպանում և մարդու իրավունքների պաշտպանություն։ Կողմերը անդրադարձել են նաև ՄԱԿ-ի Կենսաբազմազանության մասին կոնվենցիայի կողմերի 17-րդ համաժողովի (COP17) կազմակերպական գործընթացներին։
Արամ Մեյմարյանը կարևորել է կենսաբազմազանության պահպանության և մարդու իրավունքների փոխկապակցվածությունը, ինչպես նաև տարբեր շահառու խմբերի ձայները լսելի դարձնելու անհրաժեշտությունը։ Նա ընդգծել է, որ COP17-ի նախապատրաստության փուլում կարևոր է ձևավորել համընդհանուր օրակարգ՝ ապահովելով լայն հանրային ներգրավվածություն։
Հանդիպման ավարտին կողմերը պայմանավորվածություն են ձեռք բերել շարունակական համագործակցության խորացման և ՌՎԻ փորձագիտական ներուժի ավելի ակտիվ ներգրավման կարևորության հարցում՝ բնապահպանական քաղաքականությունների մշակման և իրագործման գործընթացներում։